30.07.2026. » 11:01 | ACDC
U prezantuan rezultatet e projektit “Së bashku për lumenj të pastër”
Konferenca përmbyllëse e projektit “Së bashku për lumenj të pastër”, i zbatuar nga ACDC dhe REC, u mbajt më 29 korrik 2026 në Shtëpinë e BE-së në Mitrovicën e Veriut.
Në konferencë u prezantuan rezultatet kryesore të projektit, duke përfshirë publikimin mbi gjendjen e lumit Ibër, kadastrën e burimeve të ndotjes dhe rekomandimet për menaxhimin e qëndrueshëm të burimeve ujore.
Publikimi, i hartuar në bazë të vizitave në terren, analizës hapësinore dhe shqyrtimit të dokumentacionit në dispozicion, përfshin më shumë se 200 lokacione kritike të identifikuara dhe të vendosura në hartë. Ato përfshijnë deponi ilegale të mbeturinave, shkarkime të drejtpërdrejta të ujërave të zeza, vende të nxjerrjes së rërës dhe zhavorrit, barriera ujore dhe burime të tjera të degradimit të mjedisit. Gjetjet dhe rekomandimet përbëjnë një bazë për zhvillimin e projekteve dhe masave të ardhshme nga komunat dhe institucionet përkatëse.
Për rezultatet e projektit dhe mbrojtjen e burimeve ujore folën Stefan Kalaba nga ACDC, Florentina Hajdari Hajra nga programi SKAT/IWRM-K, studiuesi Ljubiša Mijačić dhe profesoresha Jelena Đokić. Në konferencë morën pjesë gjithashtu përfaqësues të REC-it, shoqërisë civile dhe mediave, vullnetarë të rinj dhe ekspertë të mbrojtjes së mjedisit.
Projekti synoi përmirësimin e cilësisë së burimeve ujore dhe forcimin e qeverisjes mjedisore në komunitetet multietnike në territorin e Mitrovicës së Veriut dhe Mitrovicës së Jugut, Zveçanit, Zubin Potokut dhe Leposaviqit.
Projekti u mbështet në kuadër të programit Menaxhimi i Integruar i Burimeve Ujore në Kosovë (IWRM-K), i financuar nga Agjencia Zvicerane për Zhvillim dhe Bashkëpunim (SDC) dhe Qeveria e Kosovës, ndërsa zbatohet nga SKAT Consulting Ltd. në konsorcium me Agjencinë Austriake të Mjedisit (EAA).
Lajmet e fundit
