24.02.2026. » 17:46 | ACDC
U mbajt panel-diskutimi për të drejtat e punës dhe punësimin në Mitrovicën e Veriut
OJQ ACDC më 24 shkurt 2026 organizoi në EU House në Mitrovicën e Veriut një panel-diskutim publik me temën “Të drejtat e punës dhe punësimi: Sfidat dhe mbrojtja institucionale”. Ngjarja u realizua në kuadër të projektit “Justice@Work”, i financuar nga Community Development Fund (CDF) përmes programit Human Rightivism, me mbështetjen e Sida-s.
Qëllimi i diskutimit ishte të mbledhë përfaqësues të institucioneve relevante, ekspertë juridikë dhe qytetarë për të hapur dialog mbi sfidat kryesore në fushën e të drejtave të punës, me fokus të veçantë në mekanizmat institucionalë të mbrojtjes dhe qasjen në drejtësi në veri të Kosovës.
Laura Mustafa Berisha, Udhëheqëse e Divizionit të Inspektimit në rajonin e Mitrovicës pranë Ministrisë së Financave, Punës dhe Transfereve të Kosovës, foli për punën e deritanishme të Inspektoratit të Punës, duke theksuar se mandati i këtij institucioni është zgjeruar edhe në veri të Kosovës dhe se Inspektorati zbaton ligjin dhe vepron sipas ankesave të qytetarëve. U theksua nevoja që qytetarët të raportojnë më aktivisht shkeljet e të drejtave të punës, si dhe sfidat në punë, përfshirë kapacitetet e kufizuara dhe barrierat gjuhësore, por edhe fakti se në përputhje me ligjin shqiptohen masa përkatëse.
Avokati Nebojša Vlajić u ndal në kompleksitetin e së drejtës së punës dhe kontekstin specifik juridik në veri të Kosovës, ku ekzistenca e sistemeve paralele mund të çojë në pasiguri juridike dhe vështirësi në qasjen në mbrojtje gjyqësore. U theksua veçanërisht se procedurat e gjata gjyqësore e vështirësojnë më tej realizimin e të drejtave të punëtorëve.
Zëvendës Ombudspersoni Srdjan Sentić prezantoi kompetencat e këtij institucioni dhe theksoi rëndësinë e mbrojtjes së të drejtave të punës si pjesë përbërëse e mbrojtjes së të drejtave të njeriut, duke përfshirë të drejtën në punë dhe ndalimin e diskriminimit.
U konstatua se është e nevojshme të përmirësohet bashkëpunimi institucional, të forcohen kapacitetet e Inspektoratit të Punës, të sigurohet qasje më e madhe gjuhësore në institucione dhe të përmirësohet zbatimi i rekomandimeve të trupave të pavarura, në mënyrë që punëtorët në veri të Kosovës të kenë qasje efektive dhe thelbësore në drejtësi.
Najnovije vesti
